പ്രാദേശിക മുൻഗണനയുടെയും ഓരോ പട്ടികവർഗ്ഗ സെറ്റില്മെന്റിനും അനുയോജ്യമായ പ്രവർത്തനങ്ങളുടെയും അടിസ്ഥാനത്തിലാണ് ഈ പദ്ധതിയുടെ നിർദ്ദിഷ്ട ഘടകങ്ങൾ തീരുമാനിക്കേണ്ടത്. ഓരോ പ്രദേശത്തിന്റെയും കാർഷിക പാരിസ്ഥിതിക സാഹചര്യങ്ങൾ കണക്കിലെടുത്തുകൊണ്ട് വിദഗ്ദ്ധരുടെ സഹായത്തോടെ വരുമാനം വർദ്ധിപ്പിക്കുന്നതിനുള്ള വിവിധ മാർഗ്ഗങ്ങളായ ഹോംസ്റ്റെഡ് ഫാമിംഗ്, ഗ്രൂപ്പ് ഫാമിംഗ് തുടങ്ങിയവ വകുപ്പ് വികസിപ്പിക്കേണ്ടതാണ്. ഇങ്ങനെ തയ്യാറാക്കുന്ന വിവിധ തരത്തിലുള്ള വരുമാന വർദ്ധന മാർഗ്ഗങ്ങൾ കൂട്ടിച്ചേർത്ത് പദ്ധതി രേഖയാക്കി രൂപപ്പെടുത്തുന്നതാണ്. ഇടനിലക്കാരുടെ ചൂഷണമില്ലാതെ വില്ലേജ് മാർക്കറ്റുകൾ (ചന്ത) ഏറ്റെടുത്ത് നടത്തുന്നതിൻ ട്രൈബല് ഗ്രൂപ്പുകളെ ഏല്പ്പിക്കുന്നതാണ്. പച്ചക്കറികൾ, ഇലക്കറികൾ, മറ്റ് തിന വിത്തുകൾ, മത്സ്യകൃഷി എന്നിവ ഉൾപ്പെടെയുള്ള സമഗ്രമായ കാർഷിക രീതികൾ കൃഷി, ഫിഷറീസ് വകുപ്പുമായി കൂടിയാലോചിച്ച് രൂപപ്പെടുത്തും. അട്ടപ്പാടിയിലെ കാർഷികോൽപ്പന്നങ്ങൾ പട്ടികവർഗ്ഗക്കാരുടെ ഉപഭോഗത്തിനായി എത്തുന്ന തരത്തിൽ പൊതുവിതരണ സംവിധാനത്തിന്റെ സേവനം ഉറപ്പാക്കും.

പദ്ധതിയില് താഴെ ചേർത്തിരിക്കുന്ന മൂന്ന് ഉപപദ്ധതികൾ ഉൾപ്പെടുന്നു.

അട്ടപ്പാടിയിൽ നടന്നുകൊണ്ടിരിക്കുന്ന മില്ലറ്റ് വില്ലേജ് പ്രോഗ്രാം, അഗ്രോ-ഇക്കോളജിയിലൂടെ പോഷകാഹാര പര്യാപ്തത (നമുത് വെള്ളമേ), ഇടുക്കി വയനാട് ജില്ലകളില് നടത്തിവരുന്ന ഹരിത രശ്മി പദ്ധതി തുടങ്ങിയ കാർഷിക പദ്ധതികൾ വിലയിരുത്തുകയും മൂല്യവർദ്ധനവ്, സംസ്കരണം, വിപണനം, ഫാർമർ പ്രൊഡ്യൂസർ കമ്പനികളുടെ രൂപീകരണം തുടങ്ങി പദ്ധതിയുടെ രണ്ടാം ഘട്ടം അനുയോജ്യമായ രീതിയിൽ ഏറ്റെടുക്കുന്നതാണ്.

വിദ്യാഭ്യാസത്തിലൂടെയും ആരോഗ്യത്തിലൂടെയും പട്ടികവർഗ്ഗ കുട്ടികളുടെ സമഗ്രമായ വികസനത്തിൻ എം.ആർ.എസ് ഊന്നൽ നൽകുന്നു. കാർഷിക രീതികൾ (കൃഷിക്കും അനുബന്ധ മേഖലകൾക്കുമുള്ള പഠനവും പ്രായോഗിക ക്ലാസുകളും) എം.ആർ.എസുകളുടെ പാഠ്യപദ്ധതിയിൽ ഉൾപ്പെടുത്തും.

ഈ ഘടകത്തിൽ അവരുടെ പരമ്പരാഗത കാർഷിക ഉൽപന്നങ്ങളുടെ കൃഷിയിലും ആധുനിക കൃഷിയിലും പരിശീലനം നല്കുവാനും കൂടാതെ, പട്ടികവർഗ്ഗ വിദ്യാർത്ഥികൾക്ക് അവരുടെ പതിവ് സ്കൂൾ സിലബസിനൊപ്പം തേനീച്ച വളർത്തൽ, മൃഗസംരക്ഷണം, മത്സ്യബന്ധനം തുടങ്ങിയവയില് അറിവ് നല്കുന്നതിനും പരിശീലിക്കുന്നതിനുമുള്ള എല്ലാ സൗകര്യങ്ങളും എം.ആർ.എസ്സില് ഒരുക്കി നല്കുന്ന പ്രവൃത്തികളും ഉൾപ്പെടുന്നു.